لو بتفكر تقضي إجازة العيد في ظل ازمة كورونا يبقي لازم تاخد بالك من الحاجات دي كويس جدا

بما ان السياحة الداخلية اشتغلت بشكل رسمى فدى بعض النقاط ال تحطها فى اعتبارك لو قررت تخرج تتفسح وتغير جو الفترة الجاية . معلش الكلام كتير وفيه بعض الاجزاء قوية وصعبة بس دى الصورة كاملة ال لازم تعرفها . 

اولا .. متسترخصش .. متسترخصش .. متسترخصش دى اهم نقطة .. يعنى سواء هتحجز فى الظروف دى مع شركة سياحة او هتحجز اون لاين او مع الفندق نفسه اووووعى تفكر تحجز حاجة رخيصة او مش مضمونة لان باختصار عشان تضمن اعلى معايير السلامة ليك ولاسرتك اختار فندق معروف لان تعليمات وزارة الصحة والشروط ال حطاها وزارة السياحة لفتح الفنادق مش هيطبقها صح الا كيان محترم كبير وبيحافظ على اسمه وخايف على سمعته . ودا لا يمنع ابدا ان فى بعض الفنادق الصغيرة ممكن تطبق القواعد بس لازم تكون متاكد وواثق من دا قبل اى خطوة تفكر فيها . 

ثانيا .. لو حاطط فى دماغك ان اسعار الفنادق والانتقالات والرحلات بشكل عام هتنزل وتبقى رخيصة بفارق سعر ملحوظ عن السنة ال فاتت تبقى غلطان لسبب بسيط جدا وهو ان اجراءات الوقاية والسلامة ال مفروضة من الدولة على الفنادق لتامين النزلاء مكلفة واولها ان الفندق هيشتغل بربع طاقته فقط .. دا غير ان الفنادق مجبرة على توفير كحول ومطهرات ومواد تعقيم بشكل دورى على مدار اليوم ودا طبعا هيتم تحميله على تمن اقامتك .. فلو لقيت فنادق نزلت من اسعارها بشكل كبير وملحوظ تاكد مليون فى المية انك مش هتخد الخدمة الطبيعة والامنة لان مش طبيعى انه هيتحمل اجراءات الوقاية على نفقته الخاصة او هيخسر . 

ثالثا .. طبعا لو اخدت قرار انك تسافر وتخرج فاكيد انت مش محتاج ان حد يقولك ان مع الخطوة دى لااازم تكون عارف كل عوامل السلامة وازاى تحمى نفسك واهلك باعلى درجة وقاية ممكنة وتوفر لنفسك كل مواد الوقاية بكميات احتياطية بزيادة زى الكحول والمطهرات والكمامات  .. وتكون عارف  ان سلامتك هى مسئوليتك انت لوحدك مفيش حد هيكون مسئول عن سلامتك . 

رابعا .. فكرة انك طالع سياحة فى فندق عشان تغير جو فدا فى الفترة الجاية هيتطلب منك انك تحاول تقلل خروجك خارج نطلق الفندق قدر المستطاع يعنى انت طالع تستجم فقط فكرة الفسح والخروج والتنطيط والاكتيفتى ال بتتعمل تحاول تبعد عنها لان لو الفندق مهتم بالتعقيم وبيحاول يحافظ على سلامتك فانت متضمنش الشوارع والزحام ال برا لان دا صعب السيطرة عليه . 

خامسا .. لو هتحجز باص للسفر او هتسافر مع شركة اتاكد ان الباص بيتعقم بعد كل رحلة ولو طالع لوحدك وتقدر تحجز الكرسى التانى ال جنبك زيادة امان يكون افضل طبعا من الاحتكاك بحد انت متعرفوش . 

سادسا .. خليك عارف ان موضوع الاوبن بوفيه دا فى حد ذاته كارثة .. ففكرة ان الاقامة فى الفنادق تبقى وجبات محددة تختار منها دى حاجة كويسة طبعا ودا الصح ال لازم يحصل ولو فندق خالف كدا يبقى متفكرش انك تنزل فيه اصلا لانه كدا بيخاطر بيك ومش بيطبق معايير الوقاية . ولو مسموح لك مشروبات فى الاقامة بتاعتك فلازم تستخدم اكواب بلاستيك ال بتستخدم مرة وتترمى بلاش استخدام اى اطباق او اكواب بتستخدم لاكثر من مرة مع اكتر من نزيل .

سابعا .. مش محتاج حد يقولك انك على الشط او البسين او فى الريسبشان او فى اى مكان لازم تخد مسافات امنة كافية متقلش عن متر بينك وبين ال جنبك ومتحاولش تختلط بحد عن قرب وتحاول تعقم كل حاجة بنفسك قبل استخدامها حتى لو الفندق عقمها ادامك .. انت عقمها تانى زيادة امان . 

ثامنا .. وقت ما تيجى تحجز ياريت تتواصل مع الفندق مباشرة تعرف منه ايه المسموح وايه ال غير مسموح طوال فترة اقامتك وتاكد من ال هتحجز معاهم هل فى اى مصاريف او مدفوعات اضافية بعد وصولك الفندق عشان الوقاية .. عشان متروحش تتفاجئ باى حاجة انت مش عامل حسابك عليها وتبوظ عليك رحلتك . 

تاسعا .. الفيروس دا حاجة خفية انت بتتعامل على انها موجودة حواليك فى كل مكان هتلمسه او هتدوس عليه .. فلو مش عندك الوعى الكامل فى انك تتعامل معاه بلاش تخاطر بسلامتك وسلامة اسرتك وال حواليك عشان تنبسط كام يوم هتعرض نفسك وال حواليك بعدهم للخطر . 

عاشرا .. لو هتفكر تحجز شقق مصيفية او شاليهات فى اى مكان ساحلى طبعا مش هقولك انك لازم قبل استلام الشاليه او الشقة تلبس كل معدات الوقاية الممكنة وتدخل بنفسك تعقم كل حاجة تعقيم كويس جدا جدا .. مع انى مرشحش لحد ابدا الاقامة فى شقق او شاليهات فى مصايف لان طبعا مبيكونش فى فريق تعقيم زى الفنادق الكبيرة . 

الحادى عشر .. لو هتقضى داى يوز فى اى مكان زى الفيوم او السخنة او اسكندرية فانت محتاج تختار اماكن بقدر المستطاع تقعد فيها وتكون مش مزدحمة او فيها تكدس يعنى اختار مثلا بلاج خاص او داى يوز فى فندق كبير بيطبق المعايير المطلوبة وابعد عن التنطيط والتحركات الكتير والمزارات بقدر المستطاع . 

الثانى عشر .. لو قررت تخرج فى حدائق عامة او متنزهات فى محافظتك او الكورنيش فحاول تخد معاك مستلزماتك الشخصية معاك وتفضل تكون صالحة للاستخدام مرة واحدة بس زى مفارش بلاستيك واكواب تقدر تتخلص منها بعد ما تخلص ومتقعدش فى اى مكان عام الا لما تعقمه او تفرش حاجة قبل ما تقعد وخد مسافة كافية بين ال جمبك . 

 الثالث عشر .. لو واخد القرار وقررت تغامر وتروح فندق  الفنادق ال مش معروفة او رحلات باسعار رخيصة فحاول بقى تخد معاك كل حاجة خاصة بيك زى ملايات للسرير  من عندك وخد معاك سليبر بتاعك والفوط وادوات النظافة والتعقيم .

اخيرا .. السياحة الفترة الجاية هيتغير مفهومها كتير عن ال احنا عارفينه ودا طبعا بسبب الظروف المحيطة فى العالم كله وال متوقع تستمر لسه معانا لشهور وربما لسنين .. فعود نفسك على الوضع الجديد وطرق التعامل بحرص مع كل حاجة .. ولو انت مش مقتدر الفترة دى على نفقات السياحة بامكانيات محدودة فبلاش تغامر بنفسك او تستهون وتقول اى رحلة وخلاص لان فى الحالة دى انت بتعرض نفسك وكل ال حواليك للخطر . احجز مع اماكن او شركات موثوق فيها او مع مؤسسات رسمية . 

الخلاصة فى كلمتين 

عندك الوعى الكاااافى للتعامل مع الوباء بكل طرق الوقاية الصحيحة وهتعرف تحمى نفسك وال معاك باكبر قدر ممكن وعندك القدرة تنزل فى مكان محترم بيطبق معايير السلامة بشكل صحيح اطلع رحلتك فى حفظ الله وامانه .. غير كدا يبقى انت حرفيا بتفكر فى سعادة وقتية متوقع بنسبة كبيرة تنتهى بكارثة لاقدر الله . 

ربنا يحفظكم ويحفظ الجميع وعيد سعيد عليكم جميعا .. دمتم سالمين 🙏

#منقول